圣地故乡 - 斗本加/才让东珠

词：扎更巴

曲：才让东珠

制作：谢旦贴吧工作室

ཕ་ས་ལག་མཐིལ་འདྲ་བོའི་ཤུར་ཞིག་ན། །

ཆུ་མོ་རྟ་རྔ་འདྲ་ཞིག་འོད་ལམ་ལམ། །

ལྷ་ལ་མཆོད་ཁ་མི་ཡི་སྐོམ་ཁ་གསོས། །

སྲིད་གསུམ་ཁམས་ལ་མཆོད་པ་འདི་ལས་མེད། །

ཆུ་མོ་རྟ་རྔ་འདྲ་བོ་སྐམ་སོང་ན། །

མར་གྱུར་འགྲོ་བའི་ཞལ་ལ་ཅི་ཞིག་གསོལ། །

ལྷ་ཀླུ་མི་ལ་ནུས་མཐུ་གང་ཡོད་ན། །

ལ་ལུང་ཆུ་མགོ་ཕྲ་མོ་སླར་གསོས་ཤིག །

མ་ས་བྲང་མགོ་འདྲ་བོའི་སུལ་ཞིག་ན། །

རྩི་ཏོག་ཐར་མ་ཐོར་ཞིག་མགོ་ལྡེམ་ལྡེམ། །

ལྷ་ཡི་མནོལ་བསངས་མི་ཡི་ན་བ་གསོས། །

སྲིད་གསུམ་ཁམས་ན་སྨན་མཆོག་འདི་ལས་མེད། །

རྩི་ཏོག་ཐར་མ་ཐོར་དེ་འཐོར་སོང་ན། །

མར་གྱུར་འགྲོ་བའི་ན་ཚ་གང་གིས་གསོ། །

ལྷ་ཀླུ་མི་ལ་ནུས་མཐུ་གང་ཡོད་ན། །

རྩྭ་རྩི་ལྗོན་ཤིང་ཀུན་ཀྱི་སྲོག་གསོས་ཤིག །

རང་ས་ཐོད་པ་འདྲ་བོའི་ངོས་ཞིག་ན། །

སྤང་ཐང་སེན་མོ་འདྲ་ཞིག་ལྗང་ཏིག་ཏིག །

ལྷ་ངོ་བསྟོད་ས་མི་སེམས་བསངས་ས་ཡིན། །

སྲིད་གསུམ་ཁམས་ན་སྨོན་ས་འདི་ལས་མེད། །

སྤང་ཐང་སེན་མོ་འདྲ་བོ་འཇིགས་སོང་ན། །

མར་གྱུར་འགྲོ་བའི་གནས་ཚང་གང་ལ་འཆའ། །

ལྷ་ཀླུ་མི་ལ་ནུས་མཐུ་གང་ཡོད་ན། །

ས་ཆེན་ཨ་མའི་ལུས་ལ་བཅུད་གསོས་ཤིག །